အမေရိကန်ရွေးကောက်ပွဲ သမ္မတလောင်းများနဲ့ ယုံကြည်မှု Presidential Candidates in 2015

Republican

 ရီပတ်ဗလီကင် ၄၂ ရာနှုန်းက သူတို့ပါတီရဲ့ သမ္မတလောင်းဟာ Donald Trump ဖြစ်မယ်လို့ ထင်ကြတယ်။ ၄၃ % ကတော့ ရွေးကောက်ပွဲကြီးမှာ နိုင်ခြေ အရှိနိုင်ဆုံးသူ ဖြစ်တယ်လို့ သူ့ကို ယူဆကြတယ်။ ၁၅% က Ben Carson ။ ၁၂% က Jeb Bush လို့  ABC News ရဲ့ စစ်တမ်းက ဆိုတယ်။ Marco Rubio က နံပါတ် ၄ နေရာ ရပြီး ထောက်ခံသူ  ၅ % ရှိပါတယ်။ - The Washington Examiner
Conservative group တခုရဲ့ Christian Voting Guide က Biblical qualifications ကျမ်းစာပါ အရည်အချင်းတွေကို ကြည့်ပြီး မဲလမ်းညွှန်ရာမှာတော့ -
Arkansas ပြည်နယ်အုပ်ချုပ်ရေးမှုးဟောင်း Mike Huckabee က "A" ရပြီး၊ Donald Trump က "F" ပဲရပါတယ်။
ဒီစစ်တမ်းကို USA Christian Church ရဲ့ Pastor Steven Andrew က ကောက်ယူတာဖြစ်ပြီး သမ္မတဖြစ်ဖို့ ကျမ်းစာပါ အရည်အချင်းနဲ့ညီသူ ၄ ယောက်ပဲ ရှိတယ်လို့ ဆိုတယ်။ သမ္မတရားကို မြတ်နိုးမှု truthfulness ၊ လောဘကင်းမှု၊ ဘုရားပေးအခွင့်အရေးတွေကို ကာကွယ်မှု၊ ဘုရားကို ကြောက်ရွံ့ ရိုသေမှု၊ ခရစ်ယာန် ဘာသာရေးလွတ်လပ်ခွင့်ကို ကာကွယ်မှုတွေနဲ့ တိုင်းတာခဲ့တယ်။ Ted Cruz, Ben Carson, နဲ့ Rand Paul တို့က B- grade ရကြပြီး၊ Huckabee က A ရပါတယ်။
Trump, Carly Fiorina, Marco Rubio, Jeb Bush, Chris Christie, Hillary Clinton, Joe Biden, and Bernie Sanders တို့က F grade ပဲ ရကြပါတယ်။

Mike Huckabee

Mike Huckabee

  “ငွေကုန်ခံနိုင်တာ မကြည့်နဲ့။ လူကြိုက်များတာ မကြည့်နဲ့။ ဘုရားစိတ်တော်နဲ့တွေ့ဖို့ လိုတယ်။ ဘုရားစိတ်တော်နဲ့ တွေ့တဲ့သူ ဦးဆောင်မှ တိုင်းပြည် ကောင်းကြီးခံရမယ်။ Mike Huckabee ကတော့ ဒါဝိဒ်မင်းနဲ့ အနီးစပ်ဆုံးသူ ဖြစ်တယ်” လို့ Pastor Andrew က ဆိုတယ်။ Mike Huckabee ဟာ နှစ်ခြင်း သင်းအုပ်ဆရာ ဖြစ်ခဲ့ဖူးတယ်။ 

Ted Cruz

Ted Cruz

Evangelicals တွေကြားမှာ လူသိများတဲ့ Ted Cruz ကတော့ "လူကို ပြောင်းလဲစေနိုင်တဲ့ ခရစ်တော်ရဲ့ မေတ္တာကြောင့်သာ မဟုတ်ရင် ကျွန်တော်ဟာ အိမ်မှာ အဖေမရှိဘဲ အမေတယောက်တည်းက
ကြည့်ရှုပြုစုရင်း ကြီးပြင်းလာရသူ ဖြစ်ခဲ့မှာပဲ။" လို့ ဆိုတယ်။ သူ ငယ်ငယ်မှာ အဖေက အရက်သမား။ မိသားစုကို ပစ်ပြီး၊ အိမ်က ထွက်သွားတယ်။ တခြားပြည်နယ်ရောက်တော့ ဧဝံဂေလိတရား ကြားရပြီး၊ ကယ်တင်ခြင်းရကာ အိမ်ပြန်လာခဲ့တယ်။ အခုတော့ သူ့အဖေဟာ သင်းအုပ်ဆရာ Pastor Raphael Cruz ဖြစ်နေပြီ။

Ben Carson

Ben Carson

  Ben Carson က Seventh-day Adventist တယောက်ဖြစ်ပြီး၊ အဓိက ခရစ်ယာန် အသင်းတော်များထဲမှာ ပါလေ့မရှိတဲ့ အသင်းတော်ပါ။ သုတ္တံကျမ်းကို ဖတ်ရင်း ဒေါသစိတ်ကို ထိန်းချုပ်လာနိုင်ခဲ့တယ်။ Booker T. Washington အကြောင်းစာအုပ်နဲ့ ဓမ္မဟောင်းကျမ်းထဲက ယောသပ် အကြောင်းဟာ သူ့ကို ပုံသွင်းပေးတဲ့ အကြောင်းအရာတွေလို့ ဆိုတယ်။ “Our land right now is in need of God's healing hands.”  “တို့တိုင်းပြည်ဟာ အခုအချိန်မှာ ဘုရားလက်တော်နဲ့ ကုစားဖို့ လိုနေပြီ။” လို့ ဦးနှောက်ခွဲစိတ် ဆရာဝန်ကြီးဖြစ်ခဲ့တဲ့ Dr. Ben Carson ဆိုပါတယ်။

Jeb Bush

Jeb Bush

  Jeb Bush ရဲ့ ဖခင် George H.W. Bush က Episcopalian ။ မိခင် Barbara က Presbyterian ။ အကို George W. Bush က Billy Graham နဲ့ စကားပြောပြီးနောက်ပိုင်း အရင်လို အရက်မသောက်တော့ဘူးဆိုတဲ့ evangelical တယောက်ဖြစ်ပေမယ့် Jeb Bush ရဲ့ ဇနီးက Catholic ဖြစ်တော့၊ Jeb ကလည်း Catholic ပါ။

Donald Trump

Donald Trump

 Republican ထဲမှာ ရှေ့ဆုံးက ပြေးနေတဲ့ Trump ဟာ ဘုရားကို ကိုးကွယ်တာ မဟုတ်ဘူး။ ငွေကို ကိုးကွယ်တာလို့ Andrew ဆိုတယ်။ Donald Trump ဟာ Presbyterian တယောက်ဖြစ်တယ်။ ဒါပေမယ့် သူက …. "ဘုရားသခင်ထံမှာ ခွင့်လွှတ်ခြင်းရဖို့ တခါမှ ဆုမတောင်းဖူးဘူး။ အမှားလုပ်မိရင် အမှန်ပြင်ဖို့ပဲ ကြိုးစားတယ်။ ဘုရားကျောင်းသွားရင်ပဲ စပျစ်ရည်သောက်တယ်။ တခြားမှာ မသောက်ဘူး။ မုန့်တဖဲ့ စားတယ်။ ဒါကခွင့်လွှတ်ခြင်း ခံရဖို့လေ။ ဒါတော့ ခဏခဏ လုပ်တယ်။" လို့ ဆိုတယ်။
Oct 15-18 အတွင်းထွက်လာတဲ့ Wall Street Journal/NBC News ရဲ့ စစ်တမ်းတွေအရ Trump ဟာ Republican တွေကြားမှာ လူကြိုက်အများဆုံးအဖြစ် ၂၅% ထောက်ခံမှုရကာ ရှေ့ဆုံးက ပြေးနေပြီး၊ Carson က ၂၂%၊ Huckabee က နောက်ဆုံးနားမှာ ၃% ပဲ ထောက်ခံမှုရပါတယ်။
Trump အနေနဲ့ Republican သမတလောင်းအဖြစ်အရွေးခံရရင် ဦးနှောက်ခွဲစိတ် ဆရာဝန်ကြီးဖြစ်ခဲ့တဲ့ Ben Carson ကို ဒုသမ္မတလောင်းအဖြစ် လက်တွဲမလားလို့ မေးရာမှာတော့
မစဉ်းစားရသေးဘူး လို့ ဆိုတယ်။
"လူတွေထင်သလို ကျွန်တော်တို့ နှစ်ယောက်က ပုံစံမကွာလှပါဘူး။ ရင်းရင်းနှီးနှီးပါပဲ။ ပုံစံချင်းတော့ မတူဘူးပေါ့။ ကျွန်တော် တော်တာရှိသလို၊ သူတော်တာတွေလည်း ရှိတယ်။" "သူ့ကို သဘောကျတယ်။ ကျွန်တော်ကိုလည်း သူသဘောကျပါတယ်။"

Democratic

Bernie Sanders

Bernie Sanders

 Vermont ပြည်နယ် senator နဲ့ Democratic သမ္မတလောင်း အသက် ရ၄ နှစ်အရွယ် Bernie Sanders ကတော့ ဂျူးလူမျိုး ဖြစ်တယ်။ ဒီမိုကရက်တစ် ဆိုရှယ်လစ် တယောက် ဖြစ်တယ်။ ဘာသာရေးနဲ့ ဝေးဝေးနေလေ့ ရှိတယ်။
Deeply conservative Christian school ဖြစ်တဲ့ (ကွန်ဆာဗေးတစ် အားကြီးတဲ့ ခရစ်ယာန် ကျောင်းတကျောင်းဖြစ်တဲ့) Liberty University မှာ လာ မဲဆွယ်ရာမှာတော့ ကိုယ်ကျင့်တရား ရှိတာ၊ ရိုးသားတာ၊ သူတပါးအပေါ် ကောင်းဖို့ သင်ယူနေကြတာ ကောင်းတယ် လို့ ဆိုတယ်။ "ကိုယ်ဝန်ဖျက်တာနဲ့ ယောကျင်္ားချင်း လက်ထပ်တာတွေကတော့ ခင်ဗျားတို့ သိပ်အလေးအနက်ထားမှန်း သိပါတယ်။ ဒီနေရာမှာတော့ သဘောထားကွဲပါတယ်။ ဒါပေမယ့် တိုင်းပြည်နဲ့ ကမ္ဘာကြီးအတွက် တခြား အကြောင်းအရာတွေ ရှိသေးတယ်။ သဘောထားတွေ ကွဲလွဲပေမယ့် အတူလက်တွဲ ဖြေရှင်းကြရပါမယ်။"

Hillary Clinton

Hillary Clinton

 နိုင်ငံခြားရေးဝန်ကြီးဟောင်း Hillary Clinton ကတော့ ပထမဆုံးအမျိုးသမီး အမေရိကန် သမ္မတဖြစ်ဖို့ ကြိုးစားနေသူ ဒီမိုကရက်ပါ။ သူက Methodist ပါ။ Liberal Democrat ဖြစ်ပေမယ့် ဘာသာရေးအကြောင်း လူသိရှင်ကြား ပြောတတ်တယ်။ သူ့ပါတီထဲက ဘာသာရေးအပေါ် တင်းမာသူတွေကို သဘောထားအမြင် ပြောင်းစေချင်သူ ဖြစ်တယ်။ ဒါပေမယ့် ကိုယ်ဝန်ဖျက်တာ၊ လိင်တူလက်ထပ်တာတွေကို တရားဝင်လက်ခံဖို့ ဘာသာရေးအမြင်တွေကို ပြောင်းလဲစေချင်သူလည်း ဖြစ်နေပြန်ပါတယ်။
သူ့ကို Most godless member of the Senate ဆီးနိတ်မှာ ဘုရားမဲ့အဖြစ်ဆုံး အမျိုးသမီးလို့ ဝေဖန်သူတယောက်က ဆိုတယ်။ Jerry Falwell က Hillary Clinton ဟာ "လူစီဖါက ဒီမိုကရက် သမ္မတလောင်းအဖြစ် အရွေးခံရင်တောင် သူ့လောက် conservative evangelicals  တွေနဲ့ အခြေခံထားတဲ့ Republican တွေရဲ့ ထောက်ခံမှုကို ရမှာ မဟုတ်ဘူး။" လို့ ဆိုဖူးပါတယ်။ ဘာသာရေးကို နိုင်ငံရေးအတွက် အသုံးချသူလို့ ဆိုချင်တာပါ။       ။

Why I'm Voting for Donald Trump

အမေရိကန် သမတ ရွေးကောက်ပွဲ နီးလာတာနဲ့ အကြိ်ုက်တွေ အမျိုးမျိုး ရေးလာကြတယ်။ အကြိုက်မတူတာ သဘာဝဆိုပေမယ့် တချို့ရေးတာတွေက သိပ်စိတ်ပျက်စရာ ကောင်းပါတယ်။
ဟိုးအရင် ရွေးကောက်ပွဲတုန်းက ရေဒီယိုသတင်းဌာနတခုက မေးတော့ အမေရိကားရောက် ကရင်တယောက်က ဖြေတယ်။ “ကျွန်တော်က အိုဘားမားကို မဲပေးမယ်။ သူ့နာမည်မှာ ဘားမားပါလို့” တဲ့။ သမတရွေးမှာလား၊ မွေးဖွါးရာ နိုင်ငံမေးတာလား သိပုံမရသလို ဖြစ်နေတယ်။ တချို့ကလည်း Black မိုလို့တဲ့။ မဲရင်ပြီးရောဆိုရင် မီးသွေးခဲကို သမတခန့်လို့ ရမလား?
တချို့ကလည်း ဒေါ်အောင်ဆန်းစုကြည်ကို သမတဖြစ်စေချင်တဲ့ စိတ်နဲ့ရောပြီး မိန်းမသမတ တက်စေချင်တယ်၊ ဟယ်လာရီကို သမတ ဖြစ်စေချင်သတဲ့။ မိန်းမယူတဲ့ကိစ္စမှာသာ ကိုယ်ယူမယ့်သူက မိန်းမဖြစ်ဖို့ နံပါတ် ၁ အရေးအကြီးဆုံးလို့ ထင်တာပဲ။ သမတကတော့ ယောကျင်္ားဖြစ်ဖြစ်၊ မိန်းမဖြစ်ဖြစ် Black ဖြစ်ဖြစ်၊ ဘာဖြစ်ဖြစ်၊ စေတနာမှန်မယ်၊ အရည်အချင်း ရှိမယ် ဆိုရင် အဆင်ပြေတာပါပဲ။
ကဲ ..... အခုတော့ Dr. R. B. Ouellette ရဲ့ Why I'm Voting for Donald Trump ကို ဖတ်ကြည့်ပါဦး။
“တယောက်ကို သမတအဖြစ် မဲထည့်ဖို့ နိုင်ငံရေးတွေ မရေးဖူးပေမယ့် ဒီတခါတော့ ရေးရပါတော့မယ်။ ရီပတ်ပလီကင်ထဲမှာ စပြီး ကြိုက်မိတာကတော့ Scott Walker ပါ။ သူထွက်သွားတော့ Marco Rubio ကြိုက်တယ်။ သူထွက်သွားတော့ Ted Cruz ကြိုက်တယ်။ Donald Trump ကတော့ ၁၇ ယောက်ထဲမှာ နံပါတ် ၁၇ ပဲ။ တခြားသူတွေကို သူ့ထက် ပိုကြိုက်တယ်။
သူက စံပြတော့ မဟုတ်ဘူး။ သူက လူမှုရေးရော ဘာသာရေးမှာပါ ည့ံတဲ့အတွက် သူကို မဲပေးဖို့ ခက်နေသူတွေလည်း ရှိတယ်။ ကျွန်တော့ သဘောကတော့ သမတဆိုတာ စံပြဖြစ်မှ မဟုတ်ပါဘူး။ အသင့်တော်ဆုံးဆိုရင် ရပါပြီ။ William F. Buckley က ချပြဖူးပါတယ်။ နိုင်ခြေရှိတဲ့ ကွန်ဆားဗေးတစ် အဖြစ်ဆုံးလူကို မဲပေးရမယ်တဲ့။
Donald Trump က ကိုယ်ကျင့်တရားမရှိဘူး။ အတ္တကြီးတယ်။ အခွင့်ရေးသမား။ မတည်ကြည်ဘူး။ ဒါပေမယ့် ဒါတွေအားလုံးမှာ ဟယ်လာရီ ကလင်တန်လောက်တော့ရှိတယ်။ ကျွန်တောသဘောကတော့ Donald Trump က ညံ့တယ်ဆိုရင် Hillary Clinton က ဆိုးတာ။
1. ဒုသမတလောင်းကို သူက လူကောင်း ရွေးထားတယ်။ Pence က ခရစ်ယာန်၊ တကယ့် ကွန်ဆားဗေးတစ်၊ လူကောင်းတယောက်။ သူ့စကား Trump က ဘယ်လောက် နားထောင်မလဲ မသိပေမယ့် အနားမှာ အကြံပေးနိုင်သူတွေ ရှိနေပြီ။
2. လူ့အသက်ကို တန်ဖိုးထားဖို့ Pro-life အကြောင်းကို Mr. Trump က ပါးစပ်နဲ့တော့ ပြောဖေါ်ရသေးတယ်။ Mrs. Clinton ကတော့ ဆန့်ကျင်ဖက်မှာ တကယ့် Pro-choice သမား။ ကိုယ်ဝန်ဖျက်တာနဲ့ ပါတ်သက်လို့ ပြောရာမှာ ဘာသာရေးအတွေးအခေါ်တွေ ပြောင်းဖို့ လိုသတဲ့။
3. Mr. Trump က စီးပွါးရေးတော့ နားလည်သေးတယ်။ Mrs. Clinton ကတော့ စီးပွါးရေးကို အားမပေးဘဲ စီးပွါးရေးသမားတွေထံက ပိုက်ဆံ ဘယ်လိုယူရမလဲ ဆိုတာပဲ သိတဲ့သူ။ Mr. Trump ကြောင့် စီးပွါးရေး တက်လာနိုင်တယ်။ Mrs. Clinton နဲ့ဆို စီးပွါးရေး မတက်လောက်ဘူး။
4. တိုင်းပြည်ရဲ့ လွတ်လပ်မှုနဲ့ လူတွေရဲ့ အသက်ကို ခြိမ်းခြောက်နေတဲ့ အစ္စလာမ်မစ် အကြမ်းဖက်သမားတွေရဲ့ ရန်ကို Mr. Trump က ပြတ်ပြတ်သားသား ရပ်တည်ပြလိမ့်မယ်။ Mrs. Clinton ဟာ နိုင်ငံခြားရေးဝန်ကြီးဘဝမှာ မလုပ်နိုင်ခဲ့ဘူး။
5. Mrs. Clinton ထက် Mr. Trump က တရားလွှတ်တော်ချုပ်ကို ပိုကောင်းအောင် လုပ်နိုင်မယ်။ Mrs. Clinton အာဏာရင် liberal တရားသူကြီးတွေ ခန့်ပြီး လွတ်လပ်မှုကို ပွန်းပဲ့စေလိမ့်မယ်။
အဖြစ်အပျက်တခု ကြားဖူးပါတယ်။ လူဆိုးတယောက်မှာ ညီဖြစ်သူ သေသတဲ့။ ပြစ်မှုအတူ ကျူးလွန်ခဲ့ကြတယ်။ အကိုက သူ့ညီရဲ့ အသုဘမှာ တရားဟောဆရာတယောက် လာပြီး သူ့ညီဟာ သန့်ရှင်းသူ Saint သူတော်စင်လို့ ပြောစေချင်ပါသတဲ့။ ပြောရင် ပြောတဲ့ဆရာကို ဒေါ်လာ တသောင်း ပေးချင်လောက်အောင် စိတ်က ပြင်းပြနေတာပါ။
Catholic priest က No တဲ့။ Presbyterian ဆရာကလည်း No တဲ့။ Baprist ဆရာကတော့ ရှင်းအာင် ပြန်ပြောပြပါဦး။ ခင်ဗျားညီကို သူတော်စင်လို့ ပြောရုံပဲလား? ဒါနဲ့ ခင်ဗျားက ဒေါ်လာ တသောင်း ပေးမှာလား?
"ဟုတ်တယ်။ ပြောရုံလေးပါပဲ။"
Baptist ဆရာက "ကျုပ်ပြောမယ်ဗျာ" တဲ့။ အသုဘမှာ သူပြောတာကတော့ .........
"ဒီလူဟာ ကောက်ကျစ်တဲ့လူဆိုတာ လူတိုင်း သိပါတယ်။ ခိုးတယ်။ လိမ်တယ်။ လူတွေကို လှည့်စားတယ်။ မြို့ထဲမှာ အဆိုးဆုံးထဲက တယောက်ပေါ့။ ဒါပေမယ့် သူ့အကိုနဲ့ ယှဉ်ရင်တော့ သူက သူတော်စင်ပေါ့။"

၁၁၄ ကြိမ်မြောက် ကွန်ဂရက်လွှတ်တော် 114th Congress Heavily Religious

114th Congress Heavily Religious; 92 Percent "Christian"
ဘာသာတရားလေးစားသူတွေများလာတဲ့ ၁၁၄ ကြိမ်မြောက် ကွန်ဂရက်လွှတ်တော်၊ ခရစ်ယာန် ၉၂ ရာနှုန်း
ဇန္နဝါရီ ၂၀ မှာ ရွေးကောက်ခံရတဲ့ ၁၁၄ ကြိမ်မြောက် ကွန်ဂရက် (အောက်လွှတ်တော်) မှာ ဘာသာတရား လေးစားသူတွေ များလာတယ်လို့ Pew Research Center ရဲ့ လေ့လာချက်အရ သိရတယ်။ Christian က 92% နီးပါးဖြစ်ပြီး၊ တယောက်သောသူကတော့ ဘာသာမဲ့လို့ ဆိုတယ်။
ကွန်ဂရက်အမတ် 491 ယောက်ကို မေးမြန်းကြည့်ရာမှာ ....

• Protestants - 57.2%

• Roman Catholic - 30.7%

• Jewish - 5.2%

9% သော အမတ်တွေကတော့ မေးခွန်းကို ဖြေဆိုဖို့ ငြင်းခဲ့ကြတယ်။ Arizona ပြည်နယ် ဒီမိုကရက်အမတ် Kyrsten Sinema ဆိုတဲ့ အမတ်တဦးတည်းကသာ ဘာသာရေးနဲ့ ပါတ်သက်မှုမရှိဘူးလို့ ဖြေတယ်။
ပါတီဝင်တွေထဲက ဘာသာတရားကလည်း စိတ်ဝင်စားစရာပါ။

• Democrats 81.6% - Christians

• Republicans 99.7% - Christians

ရီပတ်ဘလီကင်အမတ် တယောက်တည်းကသာ သူဟာ Jewish ဖြစ်တယ်လို့ ဆိုတယ်။
ကွန်ဂရက်အမတ် ရ ယောက်ဖြစ်တဲ့ Republican ၄ ယောက်နဲ့ Democrat ၃ ယောက်ဟာ အမှုတော်ဆောင်တွေဖြစ်တယ်လို့ ဆိုတယ်။

Obama 2015 ၂၀၁၅ အိုဘားမား

Obama
ISIS အဖွဲ့က ဖမ်းမိထားတဲ့ လေယာဉ်မှုးကို အရှင်လတ်လတ် မီးရှို့သတ်လိုက်တဲ့အခါ လူအများ တုန်လှုပ်သွားပါတယ်။ အတော်ရက်စက်ပါလားလို့ မြင်လာကြတယ်။ ဒါပေမယ့် popular သမတ
Obama ကတော့ ဖေဖေါ်ဝါရီ ၅ ရက်နေ့ နိုင်ငံတော် ဆုတောင်းပွဲ the National Prayer Breakfast မှာ "အမေရိကန်တွေလည်း “high horse” မဖြစ်နဲ့။ ကိုယ့်ကိုကိုယ် စိတ်ကြီးဝင်ပြီး တဖက်သားကို အထင်အမြင် သေးတာ မလုပ်ရဘူး။ ခရစ်ယာန်တွေလည်း အလားတူ ရက်စက်ယုတ်မာမှုတွေကို ကျူးလွန်တာတွေ ရှိဖူးတယ်။ Crusades စစ်ပွဲကာလမှာ ခရစ်တော် နာမတော်အတွက် ဆိုပြီး ကျူးလွန်ခဲ့တယ်" လို့ ဆိုတယ်။
တကယ်တော့ Crusades စစ်ပွဲဟာ အကြမ်းဖက်သမားတွေရဲ့ ရန်ကို ခုခံ ကာကွယ်ခဲ့ရတာသာ
ဖြစ်တယ်။ အခုခေတ်လို ခေါင်းဖြတ်သတ်တာတွေ၊ မတရားပြုကျင့်တာတွေကို ပြန်လည်ခုခံရတာ
ဖြစ်တယ်။ ဒါကြောင့် သမတ Obama ဟာ သမိုင်းကို နားလည်လွဲနေတယ်လို့ ဝေဖန်ကြတယ်။
တခါ ဖေဖေါ်ဝါရီလထဲမှာပဲ ထွက်လာတဲ့သတင်းအရ အီဂျစ်မှာ ခရစ်ယာန် ၂၁ ယောက်ကို ISIS က ဖမ်းဆီးပြီး ပင်လယ်ကမ်းဖြေမှာ ခေါင်းဖြတ် သတ်ခဲ့ပါတယ်။ ဒီအခါမှာတော့ popular သမတ Obama က "အကြမ်းဖက်သမားတွေကို ပြန်တိုက်ခိုက်ပြီး နှိမ်နင်းလို့ မရဘူး။ အလုပ်လက်မဲ့ ပြသနာကြောင့်
ဖြစ်တာ။ အလုပ်အကိုင် ရှာပေးရမယ်" လို့ ဆိုပြန်တယ်။ တကယ်တော့ popular သမတဟာ သူ့သက်တမ်း ကုန်ခါနီးမှာ အကြမ်းဖက်သမားတွေ စိတ်သက်သာအောင် အားပေးနေတာပါ။ ဒါကြောင့် တချို့က Where is the Churchill of our time? ချာချီ လို ခေါင်းဆောင်မျိုး ဒီခေတ်မှာ
ပေါ်ပေါက်ဖို့ တောင့်တနေကြပါတယ်။

The Fall of The Roman Republic ရောမအင်ပါယာ ကျဆုံးခန်း

The Roman Republic came to an end when politicians became so self indulged in their own ideologies that they no longer cared about their people. They became demagogues. Violence became the means of dealing with those they opposed, and they lost the ability to be civil. Each side blamed the other. Nothing got done, and the fell into the hands of dictators who removed the republic and ruled as dictators. The fact was that is fell from within and not from without.

By Michael A. Smith

 နိုင်ငံရေးသမားတွေက ပြည်သူပြည်သားတွေကို ဂရုမစိုက်တော့ဘဲ၊ ကိုယ့်အယူအဆတွေနဲ့ကိုယ် ကြေနပ်နေတဲ့အခါ ရောမ ပြည်သူ့သမတနိုင်ငံတော်ကြီး ဇာတ်သိမ်းသွားရတယ်။ လူပြိန်းကြိုက်တွေ လုပ်လာတယ်။ ဆန့်ကျင်သူတွေကို အကြမ်းဖက်နှိမ်နင်းလာတယ်။ လူထုအားကို မရတော့ဘူး။ တဖက်နဲ့တဖက် အပြစ်ပဲ ဖို့နေတယ်။ ဘာတခုမှ မတိုးတက်ဘူး။ ပြည်သူရဲ့အာဏာ အလုခံရပြီး၊ အာဏာရှင်တွေ မင်းမူလာတယ်။ တိုင်ပြည်ကျဆုံးရတာဟာ ပြည်ပရန်ကြောင့် မဟုတ်ဘူး။ အတွင်းကလူတွေ မကောင်းလို့ ဖြစ်ရတာပါ။

Handling Things With Dirty Hands (Burmese)

လက်မဲကြီးနဲ့ လျှောက်ကိုင်သမျှဟာ ညစ်ပတ်နေမှာပဲ

                      အားကစားပြိုင်ပွဲတွေ ကျင်းပတာ ကောင်းပါတယ်။ ကျန်းမာရေးအတွက်ပဲ ဖြစ်ဖြစ်၊ အစွမ်းအစ ပြဖို့ ဖြစ်ဖြစ်၊ ကြံ့ခိုင်ရည်နဲ့ ဇွဲပြဖို့ပဲ ဖြစ်ဖြစ် အားကစားက ကောင်းပါတယ်။ ဒါပေမယ့် ငါတို့ နိုင်ဖို့၊ ဆုတံဆိပ်တွေ အများကြီးရဖို့ သူများတွေကို ဘယ်လိုညစ်ရမယ်၊ သူတို့ ရှုံးအောင် လူလည်ကျရမယ်ဆိုရင်တော့ အားကစားလည်း မကောင်းတော့ဘူးပေါ့။
တိုင်းပြည်မှာ ဥပဒေတွေ ရှိတာ ကောင်းပါတယ်။ လူအားလုံးကို တန်းတူညီမျှ ကာကွယ်ပေးမယ်ဆိုရင်ပေါ့။ ဒါပေမယ့် လူတချို့ကို သက်သက်မဲ့ အပြစ်ရှာ ဒုက္ခပေးဖို့၊ ဘယ်လိုမှ နေရာမရဖို့၊ ဖိနှိပ်ဖို့၊ ရက်စက်ဖို့ ရေးဆွဲထားတယ် ဆိုရင်တော့ ဒီဥပဒေတွေဟာ မကောင်းဘူးပေါ့။
ငြိမ်းချမ်းရေးဆွေးနွေးတာ ကောင်းတာပေါ့။ ဒါပေမယ့် မင်းတို့ ဂတိတည်ပါ။ ငါတို့တော့ ဘယ်တော့မှ မတည်ဘူး။ မင်းတို့ဖက်ကပဲ လျှော့ပေးရမယ်။ ငါကတော့ ဘာမှ မလျှော့ဖူးဆိုရင် အဲဒီလိုဆွေးနွေးပွဲမျိုးဟာ မကောင်းဘူးပေါ့။
ဘာသာတရားကို လွတ်လပ်စွာ ယုံကြည်ခွင့်ရတာ ကောင်းတာပေါ့။ ဒါပေမယ့် ကိုယ့်ယုံကြည်မှုအတွက် တခြားသူတွေရဲ့ အသက်အိုးအိမ်ကို လုယူမယ်ဆိုရင် မကောင်းတော့ဘူးပေါ့။
သန်းခေါင်စာရင်းကောက်တာ ကောင်းတာပေါ့။ ဒါပေမယ့် အချက်အလက်တွေကို လူလယ်ကျ ကောက်မယ်။ ပြီးရင် ဒီကိန်းဂဏန်းတွေကို ပြပြီး၊ လိုရာဆွဲယူဖို့ သုံးဦးမယ်ဆိုရင်တော့ ဘယ်သူက လက်ခံနိုင်မလဲ။
အဲဒီတော့ မလုပ်သင့်လို့ ပြောနေကြတာ မဟုတ်ဘူး။ လက်မည်းကြီးနဲ့ လုပ်နေတော့ အကုန်ညစ်ပတ်နေလို့ ပြောနေကြတာပေါ့။
လက်မည်းကြီးနဲ့ လျှောက်လုပ်နေမယ့်အစား၊ ဘာမှ မလုပ်ပဲ ထိုင်နေလိုက်ပါ။ အဲဒါ ပိုကောင်းပါတယ်။

Unclog Your Blood Vessels and Lower Your Blood Pressure သွေးတိုးရောဂါ

Foods that Lower High Blood Pressure

Unclog Your Blood Vessels and Lower Your Blood Pressure with This Very Simple Solution

by Natasha Edwards

သွေးထဲမှာ ကိုလက်စ်ထရောတွေ စုဝေးနေပြီး သွေးလှည့်ပတ်မှုကို ပိတ်ဆို့စေတဲ့အကြောင်းရင်းတွေ အများကြီး ရှိပါတယ်။ အသက်အရွယ်နဲ့ မျိုးရိုးကြောင့်လည်း ဖြစ်တတ်ပါတယ်။ ဆီးချို၊ သိုင်းရွိုက်အကြိတ်၊ အဝလွန်ခြင်း၊ ကျောက်ကပ်နဲ့ အသည်းရောဂါတွေကြောင့်လည်း သွေးကြောတွေ ထုံးနေတတ်ပါတယ်။ ဖိစီးမှု stress ကလည်း လူသိများတဲ့ အကြောင်းရင်းတခုပါပဲ။ အဲဒီလို စိုးရိမ်စရာတွေ မရှိရင် သွေးတိုးနဲ့ ကိုလက်စ်ထရော များတဲ့ အဖြစ်က လွတ်မယ်လို့ မပြောနိုင်သေးပါဘူး။ ဒါက အဆီများပြီး အမျှင်နဲ၊ အင်တီအောက်ဆီးဒင့်နဲ၊ လိုအပ်တဲ့ အဟာရတွေနဲ့တဲ့ အစားအသောက်တွေကြောင့်လည်း ဖြစ်တတ်ပါတယ်။ နေ့စဉ်ကိုယ်ကာယ လှုပ်ရှားမှုနဲရင်၊ ဆေးလိပ်နဲ့ အရက်သောက်တာများရင်လည်း ဒီဝေဒနာကို ခံစားရတတ်ပါတယ်။
ကိုလက်စ်ထရောနဲ့ သွေးတိုးကို ချတဲ့ဆေးတွေ ရှိပါတယ်။ ဒီဆေးတွေက ကိုလက်စ်ထရောထုတ်လုပ်ဖို့ လိုအပ်တဲ့အရာတွေကို ကိုယ်ခန္ဓာက ထုတ်မပေးဖို့ ဖေါ်စပ်ထားတာပါ။ သွေးထဲမှာရှိတဲ့ ကိုလက်စ်ထရောကို တစ်ရှုးတွေက ပြန်စုပ်ယူဖို့လည်း ဒီဆေးတွေက ကူညီပါတယ်။ ဒါမှ သွေးကြောတွေ မထုံးစေမှာဖြစ်ပါတယ်။
ကိုလက်စ်ထရော ချတဲ့ဆေးတွေက အစွမ်းထက်ပေမယ့် ဘေးထွက်ဆိုးကျိုးတွေလည်း တွဲပါလာပါတယ်။ အဲဒီဆေးတွေကြောင့် အရမ်းဝလာတတ်ပါတယ်။ ကြွက်သားတွေ နာကျင်တာလည်း ခံစားရတတ်ပါတယ်။ အရေပြားမှာ အနီကွက်တွေပေါ်တာ၊ ဖူးယောင်တာတွေ ဖြစ်တတ်ပါတယ်။ အစာမချေနိုင်တဲ့ ပြသနာကတော့ အဖြစ်အများဆုံးပါပဲ။ ဒီဆေးတွေကို အသောက်များရင် သွေးထဲမှာ သကြားဓါတ်များလာမယ်။ ဆီးချိုဖြစ်လာနိုင်တယ်။ တခြားဘေးထွက်ဆိုးကျိုးတွေကတော့ အာရုံကြောပြသနာ၊ အသည်းနဲ့ ကျောက်ကပ် ပျက်စီးတာတွေပါပဲ။
ကိုလက်စ်ထရော များနေရင်၊ သွေးတိုးနေရင် ဆရာဝန်က အခြေအနေဆိုးမသွားဖို့ အပြောင်းအလဲတချို့ လုပ်ဖို့ မပြောဘဲနေမှာ မဟုတ်ပါဘူး။ အထူးကုဆရာဝန်ထံက ရနိုင်တဲ့ အကြံပေးစကားကတော့ - - -
= အသီးနဲ့ ဟင်းသီးဟင်းရွက် မျာများစားပါ။
= အဆီ၊ ဆားနဲ့ သကြား များများပါတဲ့အစားအစာတွေကို လျှော့ချပါ။
= ငါး၊ အစေ့၊ အဆံတို့လို ကျန်းမာရေးနဲ့ညီတဲ့ အဆီမျိုးကို စားပါ။
= နှလုံးသွေးကြောတွေက် လေ့ကျင့်ခန်း မိနစ် ၂၀ လောက် ပုံမှန်လုပ်ပါ။
= ဖိစီးမှု stress ကို လျှော့ချပြီး၊ အိပ်ရေးဝအောင် အိပ်ပါ။
= ဆေးလိပ်နဲ့ အရက်ဖြတ်ပါ။
ရောဂါကြာရှည်နေရင် ဆရာဝန်က ကိုလက်စ်ထရော ချတဲ့ဆေးတွေ ပေးနိုင်ပါတယ်။ ဒါပေမယ့် မလိုအပ်တဲ့ ဘေးထွက်ဆိုးကျိုးတွေ ရလာနိုင်တာကြောင့် တခြားနည်းတွေကို သုံးဖို့ လိုလာပါလိမ့်မယ်။ သွေးကြောပိတ်တာ၊ သွေးတိုးတာအတွက် ရှေးနည်းကောင်းလေး တခုရှိပါတယ်။ တကယ့်ရိုးရိုးလေးပါ။

GARLIC ကြက်သွန်ဖြူ

  ပါဝင်တဲ့အရာများ-
= ကြက်သွန်ဖြူ ၄ ဥ
= ရှောက်သီးအရွယ်လတ် ၄ လုံး
= ရေနွေး ၃ လီတာ

နည်းစနစ်=
= ကြက်သွန်ဖြူကို အခွန်ခွါပါ။
= ရှောက်သီးတွေကို ဆေးပါ။ မသန့်သေးရင် အခွံမခွါပါနဲ့။
= ဆေးပြီးမှ ရှောက်သီးတွေကို သေးသေး စိတ်ပါ။
= ဗူးကြီးထဲမှာ ကြက်သွန်ဖြူနဲ့ ရှောက်သီးတွေကို ရောထည့်ပါ။
= အဖုံးပိတ်ပြီး ၃ ရက်လောက် နှပ်ထားပါ။

ကိုလက်စ်ထရောနဲ့ သွေးတိုးကို ရိုးရိုးလေးနဲ့ နှစ်ပေါင်းများစွာကြာအောင် ပျောက်ကင်းစေတဲ့ ဆေးနည်းကလေးပါ။ ၃ ရက်ကြာတဲ့အခါ ထမင်းစားပြီးတိုင် လက်ဖက်စားဇွန်းနဲ့ တဇွန်း စားရုံပါပဲ။ တဖြည်းဖြည်းနဲ့ ဆေးအချိန်အဆကို ကိုယ်ခန္ဓာက လက်ခံလာတဲ့အတိုင်း တိုးစားသွားနိုင်ပါတယ်။  အများဆုံးတော့ တနေ့ကို ၅၀ မီလီလီတာပဲ စားရမယ်ဆိုတာ သတိရပါ။

Cancer and Acid ကင်ဆာနဲ့ အက်စစ်

                ကင်ဆာရောဂါရဲ့ အကြောင်းရင်းကို ရှာဖွေတွေ့ရှိခဲ့တဲ့ နိုဘယ်လ်ဆုရှင် Dr. Otto H Warburg က ကင်ဆာဟာ အဓိကအားဖြင့် အောက်စီဂျင် ပြတ်လတ်လို့ ဖြစ်ရတာလို့ ဆိုတယ်။ အောက်စီဂျင်ပြတ်တော့ ကိုယ်ခန္ဓာမှာ အက်စစ်များလာတယ်။ Dr. Warburg က ကင်ဆာဆဲလ်တွေဟာ anaerobic (အောက်စီဂျင်ကို မစုပ်ယူဘူး) လို့လည်း တွေ့ရှိခဲ့တယ်။ အောက်စီဂျင်များရင် မရှင်သန်နိုင်ဘူး။ 
               သာမန်ဆဲလ်အားလုံးဟာ အောက်စီဂျင် လိုကြတယ်။ ကင်ဆာဆဲလ်တွေကတော့ အောက်စီဂျင် မလိုဘဲ ရှင်သန်နိုင်တယ်။ ဆဲလ်ထဲမှာ အောက်စီဂျင် ၃၅%၊ ၄၈ နာရီကြာအောင် ပြတ်လပ်လာရင် ကင်ဆာ ဖြစ်လာနိုင်တယ်။

ကိုယ်ခန္ဓာရဲ့ pH levels ကို ထိန်းဖို့ရာ အစားအစာက အဓိကကျပါတယ်။

               PH balance, PH မျှခြေဆိုတာ ကိုယ်ခန္ဓာတလျှောက်လုံးမှာရှိတဲ့ ဆဲလ်နဲ့ အရည်မှန်သမျှမှာ အက်စစ်နဲ့ အယ်လ်ကာလိုင်း အချိုးမျှတာကို ခေါ်တယ်။ သွေးရဲ့ pH levels ဟာ အယ်လ်ကာလိုင်း level 7.365 ရှိမှ အသက်ရှင်နိုင်ပါတယ်။ အစားအသောက်ထဲမှာ ဓါတုပစ္စည်းနဲ့ သကြား၊ အရောင်ချွတ်ထားတဲ့ အစေ့အနှံ၊ မျိုးရိုးဗီဇပြုပြင်ထားတဲ့ အသားငါးတွေကြောင့် အက်စစ်များနေနိုင်ပါတယ်။ ဒါက အက်စစ်မျှခြေ ပျက်စေပါတယ်။ မျှခြေပျက်ရင် ဆဲလ်တွေ အလုပ်လုပ်ပုံကို ထိခိုက်စေတယ်။ အက်စစ်များတာ ကြာလာရင် ကင်ဆာ၊ နှလုံးသွေးကြော၊ ဆီးချို သွေးချို၊ အရိုးပွနဲ့ ရင်ထဲပူလောင်တဲ့ ရောဂါတွေ ဖြစ်တတ်ပါတယ်။ အက်စစ်များတာ ကြာရင် အိုမင်းရင့်ရော် လာမယ်။ Robert O. Young က သူ့ရဲ့စာအုပ် The pH Miracle မှာ ကျမ်းမာရေးပြသနာ အများစုဟာ အက်စစ်များလို့ ဖြစ်ရတယ်လို့ ဆိုတယ်။ ကပ်ပါးတွေ၊ မကောင်းတဲ့ ဘက်တီးရီးယားတွေ၊ ဗိုင်းရပ်စ်တွေက အက်စစ်များရင် မြန်မြန်ကြီးထွားကြလို့ ဖြစ်တယ်။ ဒါပေမယ့် အယ်လ်ကာလိုင်းကတော့ ဘက်တီးရီးယားနဲ့ တခြားအရာတွေကို ထိန်းထားနိုင်တယ်။
                ဒါကြောင့် pH balance - pH မျှခြေကို ထိန်းခြင်းဟာ ကျန်းမာရေးအတွက် အရေးပါပါတယ်။
(LIVING TRADITIONALLY မှ)

Goliath: Hoax ဂေါလျ သတင်း အတု

ဂေါလျတ် ဦးခေါင်း

                             ဂေါလျတ်ကြီးရဲ့ ဦးခေါင်းခွံကို တူးဖေါ်တွေ့ရှိပြီဆိုတဲ့ သတင်းဟာ လိမ်လည်
နောက်ပြောင်တာသာဖြစ်တယ်။ hoax လို့ခေါ်ပါတယ်။
၁၉၉၃၊ မေလ ၂၅ ရက်ထုတ် The Weekly World News သတင်းစာမှာ ပါတဲ့ သတင်းဖြစ်ပါတယ်။ တကယ်တော့ ဒီသတင်းက "ဧဒင်ဥယျာဉ်ကို ကော်လိုရာဒိုပြည်နယ်မှာ တွေ့ပြီ။ ဧဝစားခဲ့တဲ့ အသီးကိုလည်းတွေ့ပြီ" ဆိုတဲ့ အလိမ်အညာ သတင်းမျိုးပါ။
အလားတူပဲ ၂၀၀၄ ခုနှစ်လောက်ကတည်းက ဖန်တီးထားတဲ့ ဓါတ်ပုံတပုံဟာ ၂၀၀၇ ခုနှစ် မတ်လမှာလည်း အိန္ဒိယမှာရှိတဲ့ လစဉ်ထုတ် Hindu Voice မှာ ပါလာတယ်။ BC ၂၀၀ လောက်မှာ ရေးခဲ့တဲ့ မဟာဘတ္တရ Mahabharata ကဗျာဂီတကျမ်းထဲမှာပါတဲ့ လူသန်ကြီးကိုတွေ့ပြီလို့ဆိုတယ်။ အဲဒီကနေ email တွေပို့ကြ၊ Blog တွေမှာ ရေးသားလာကြတယ်။
တကယ်တော့ အင်တာနက်မှာတွေ့တဲ့ သတင်းတွေဟာ သတင်းလာတဲ့ မူလလမ်းကြောင်း မခိုင်လုံရင် မယုံသင့်ပါဘူး။

King James Bible - Most Popular

King James Bible

 လူကြိုက်များလာတဲ့ King James Version
           အမေရိကန်တွေဟာ King James Version ကို ပိုကြိုက်လာတယ်လို့ စစ်တမ်းတွေအရ သိရတယ်။ KJV ကျမ်းစာကို ဖတ်ရှုသူက ၅၅ %၊ New International Version ကို ၁၉% နဲ့ New Revised Standard Version, New American Bible, Living Bible တို့ကတော့ ၁၀% ထက်လျော့နဲနေတယ်။
           မနှစ်က ကလေ့လာချက်ကတော့ King James နဲ့ New King James Version က ၅၂%၊ NIV က ၁၁% ဖြစ်ပါတယ်။
          Google Search မှာ ကျမ်းစာဘာသာပြန်နဲ့ ပတ်သက်တဲ့ ရှာဖွေမှုတွေကို KJV က ၄၅%၊ NIV က ၂၄% ရှိတယ်လို့ Bible Gateway အဖွဲ့က ဆိုပါတယ်။ တခြား version တွေနဲ့ ပါတ်သက်ပြီး ရှာဖွေတာတွေက အတော်နဲနေတယ်။
          ၂၀၁၁ ခုနှစ် Lifeway က လေ့လာချက်အရ အမေရိကန် ၆၂% မှာ KJV ကျမ်းစာ ရှိသလို၊ ကျမ်းစာနေ့တိုင်းပုံမှန်ဖတ်တဲ့ အမေရိကန်တွေရဲ့ ၈၂% ဟာ KJV ကျမ်းစာကို ဖတ်ကြတယ်လို့ ဆိုတယ်။
တခြား versions တွေဟာ ကျမ်းစာသားတွေကို ပေါ့ပျက်ပျက် ဘာသာပြန်ထားပြီး၊ ခဏတာ နာမည်ထွက်လာပေမယ့် ရေရှည်မှာ King James Version က အစစ်ခံနိုင်နေဆဲဖြစ်တာ တွေ့လာရပါတယ်။

They still remember! မှတ်မိနေကြဦးမှာပါ

အော့ရှ်ဝဇ် အကျဉ်းထောင်ရှေ့က အနှစ် ရ၀ ပြည့်ပွဲ

 Auschwitz အကျဉ်းထောင် အနှစ် ရ၀ ပြည့်ပွဲ
Auschwits 70th anniversary
Auschwitz အော့ရှ်ဝဇ် အကျဉ်းထောင်မှာ အသက်မသေဘဲ ကျန်ခဲ့တဲ့ လူ ၃၀၀ လောက်ဟာ ပိုလန်နိုင်ငံရှိ သေမင်းတမန် အကျဉ်းထောင်ရှေ့မှာ စုဝေးဖို့ စုရုံးရောက်ရှိလာကြတယ်။ ၁၉၄၀ နဲ့ ၁၉၄၅ ခုနှစ်အတွင်းမှာ ဒီအကျဉ်းထောင်ထဲမှာ လူပေါင်း ၁.၁ သန်းကျော် အသတ်ခံရတယ်။ အများစုက ဂျူးလူမျိုးတွေဖြစ်တယ်။ ဒီပွဲမှာ တက်ရောက်သူတွေဟာ တချိန်က အော့ရှ်ဝဇ် အကျဉ်းထောင်ထဲမှာ ကလေးဘဝ အကျဉ်းချခံနေရတုန်း ဆိုဗီယက်တပ်တွေ လာလွှတ်ပေးတုန်းက လွှတ်မြောက်လာခဲ့သူတွေ ဖြစ်ပါတယ်။ အခု သူတို့ အသက်ကြီးရင့်နေကြပြီဆိုတော့ ဒီပွဲဟာ လူအစုံဆုံးပွဲဖြစ်မယ် လို့ ဆိုရမှာပါ။
အော့ရှ်ဝဇ် အကျဉ်းထောင်ဟာ မီးရထားအဆောက်အဦးကြီးတွေရဲ့ အဆုံးမှာ ယာယီဆောက်ခဲ့တဲ့ အဖြူရောင် အဆောက်အဦကြီးဖြစ်ပြီး၊ ဥရောပတခွင်က ဂျူးလူမျိုးတွေကို ဖမ်းဆီးပို့ဆောင်ခဲ့တယ်။ ကျွန်အဖြစ် ခိုင်းစေခံရပြီး၊ နောက်ဆုံး အဆိပ်ငွေ့ခန်းမထဲမှာ ထည့်သွင်း အသတ်ခံကြရတယ်။
အခုပွဲမှာ ထောင်နံရံတွေရဲ့ ပတ်လည်မှာ ဖယောင်းတိုင်မီးတွေ ထွန်းကြတယ်။ ရေခဲပြီး နှင်းကျနေတဲ့ ကွင်းပြင်ကြီးထဲမှာ ဖယောင်းတိုင်းလေးတွေ ထွန်းရင်း အမှောင်လွှမ်းခဲ့တဲ့ အချိန်ကာလတွေကို ဥရောပက မှတ်မိနေကြောင်း ပြသကြတယ်။
ပိုလန်သမတ Bronislaw Komorowski ကတော့ “ဂျာမန်တွေဟာ ပိုလန်ကို ဂျူးသချိုင်း ဖြစ်အောင် လုပ်ခဲ့တယ်”  လို့ ဒီအခန်းအနားမှာ ပြောသွားပါတယ်။
၁၉၂၉ ခုနှစ်မှာ မွေးဖွါးတဲ့ Halina Birenbaum ဆိုတဲ့ အမျိုးသမီးကြီးကတော့ သူ့ရဲ့ အဓိက တာဝန်ကြီးကတော့ “အကျဉ်းစခန်းထဲက လူတွေဟာ သိပ်အသက်ရှင်ချင်ခဲ့ကြတယ်” ဆိုတာ နောင်လာနောက်သားတွေကို ပြောပြဖို့ပါပဲလို့ ဆိုတယ်။ “အမေမြင်ချင်တဲ့  ရက်ရက်စက်စက် ဖိနှိပ်သူတွေရဲ့ နိဂုံးကို မြင်တွေ့ရဖို့ ကျွန်မ အသက်ရှင်ခဲ့ရတာပါ။” လို့ဆိုတယ်။
အော့ရှ်ဝဇ် အကျဉ်းထောင်ဟာ ၁၉၄၅ ဇန်နဝါရီ ၂၇ မှာ လွတ်မြောင်ခွင့်ရပြီး၊ ၁၉၄၇ မှာ ပြတိုက်အဖြစ် ဖွင့်လှစ်ခဲ့တယ်။
အခုလို အခန်းအနားတွေကို ဥရောပရဲ့ တခြားနေရာတွေမှာ ကျင်းပသလို၊ အစ္စရေးနိုင်ငံရဲ့ စစ်အနိဌာရုံပြတိုက် Yad Vashem မှာလည်း ကျင်းပခဲ့တယ်။
ရက်စက်သူ၊ ယုတ်မာသူတွေရဲ့ လူမဆန် ရက်စက်မှုတွေကို ခံစားခဲ့ရသူတွေဟာ မေ့သွားမှာ မဟုတ်ဘူး။ သူတို့ မှတ်မိနေဆဲပါ။

 

အကျဉ်းထောင်ပတ်လည်က ဖယောင်းတိုင်းထွန်းပွဲ

အော့ရှ်ဝဇ် ထောင်ကို လွှတ်ပေးစဉ်က တွေ့ရတဲ့ ကလေးများ

အော့ရှ်ဝဇ်ထောင်မှ လွတ်မြောက်သူများထဲမှ ယနေ့ အသက်အကြီးဆုံးသူ ၉၆ နှစ်အရွယ်
Yuda Widawski

 

အကျဉ်းထောင်အနိဌာရုံ Schindler's List ဇာတ်ကား ဒါရိုက်တာ
Steven Spielberg လည်း အမှတ်တရပွဲသို့ တက်ရောက်

အော့ရှ်ဝဇ်အကျဉ်းစခန်း

အော့ရှ်ဝဇ်ထောင့်ရှေ့ အမှတ်တရပွဲ ဆုတောင်းသူများ

ဆိုဗီယက်တပ်က လွှတ်ပေးချိန်မှာ တွေ့ရတဲ့ကလေးတွေရဲ့ ဓါတ်ပုံမှာ ကိုယ့်ပုံကို ထောက်ပြနေသူများ

အကျဉ်းစခန်းမှာ ထိုးခံရတဲ့ ဆေးမင်ကြောင်ကို ပြနေတဲ့ အမေရိကန်ရောက် Jack Rosenthal

အကျဉ်းသားဟောင်းတွေရဲ့ ဖိနပ်တွေကို စုပုံပြထားတဲ့ အော့ရှ်ဝဇ်ထောင်ပြတိုက်

ရက်စက်ယုတ်မာသူတွေအတွက် သတင်းစကားကတော့ မှတ်မိနေတယ် ဆိုတဲ့ စကားပါပဲ။

အရူး A mad man

လူတယောက်......
 သူ့အိမ်ဘေးက တခြားသူတွေကို ကြည့်နေတယ်။
အလုပ်မလုပ်ဘူး။ စိတ်မငြိမ်ဘူး။
ပြောချင်ရာတွေ လျှောက်ပြောနေတယ်။
အိမ်နီးချင်းတွေက သူ့ကို ဂရုမစိုက်အားဘူး။
သူတို့အလုပ် သူတို့လုပ်နေကြတယ်။

အရူး

တနေ့တော့ ......
အဲဒီလူက ဘေးကအိမ်တအိမ်ကို မီးတုတ်နဲ့ ပစ်လိုက်တော့တယ်။
မီးက အိမ်ထဲကျသွားတော့
အိမ်ရှင်ရော၊ တခြားအိမ်နီးချင်းတွေပါ
အထိတ်တလန့် ပြေးကြလွှားကြ ... မီးငြိမ်းကြပေါ့။
အဲဒီလူတွေ ထိတ်လန့်သွားတာ ဗျာများကြတာ၊ စိတ်မကောင်းဖြစ်တာကို
မြင်ရတော့ အခုနက  မီးတုတ်ပစ်တဲ့လူက .....
တယောက်တည်း အော်ဟစ် သဘောကျနေသေးတယ်။
"ဟား..ဟား..ဟား.... ကောင်းတယ်၊ ကောင်းတယ်။
အဲဒီလို ထိမှကောင်းတယ်။ မှတ်ပီလား။
"နောက်ထပ် မီးတုတ်တွေ အများကြီး ပစ်လို့ရသေးတယ်နော်...
"ဒါပေမယ့် ငါက ပစ်ချင်လို့ ပစ်တာမဟုတ်ဘူး။
သူ့ဟာသူ ကျသွားတာ။
"ဒီကိစ္စကို မကြေနပ်ကြဘူးလား .....
မကြေနပ်ရင် .....
အေးအေးဆေးဆေး ဆွေနွေးကြတာပေါ့ကွာ။" ... တဲ့

အိမ်နီးချင်းတွေကတော့ သူ့ကို ဘာမှပြန်မပြောကြဘူး။
အားလုံးထဲက တယောက်ကတော့ လွှတ်ကနဲ ရေရွတ်လိုက်တယ် .....
"တို့တော့ ဒီအရူးနဲ့ ခက်နေပြီ။" .... တဲ့။

"As a mad man who casteth firebrands, arrows, and death, So is the man that deceiveth his neighbour, and saith, Am not I in sport?" - Pro 26:18- 19

"ငါ ကျီစားရုံမျှသာ ပြုသည်ဟုဆိုလျှက် မိမိအိမ်နီးချင်းကို လှည့်စားသောသူသည် မီးစ၊ မြှား၊ သေဘေးတို့ကို ပစ်တတ်သော အရူးနှင့်တူ၏။" - သုတ္တံ ၂၆း ၁၈- ၁၉

ခရစ်ယာန်သတင်း 2014, Feb

NEWS & VIEWS

  မြွေကိုင်ပြတဲ့ ဆရာ
Feb. 16, 2014 4:35pm
နာမည်ကြီး မြွေကိုင်ဆရာတယောက်ဖြစ်တဲ့ Jamie Coots ဟာ မြွေကိုက်ခံပြီးနောက် သေဆုံးသွားပါတယ်။ ညာဖက်လက်မှာ အကိုက်ခံရပြီး၊ သူက ဆေးကုဖို့ ငြင်းဆန်ခဲ့တယ်။ အရေးပေါ် လူနာတင်ယာဉ်နဲ့ ဆေးရုံပို့ဖို့ ကြိုးစားခဲ့ကြပေမယ့် ဆေးကုဖို့ လက်မခံဖူးလို့ ဆိုပါတယ်။ အရေးပေါ် စောင့်ရှောက်ရေးအဖွဲ့တွေ ည ၉း၁၀ မှာ ပြန်ခဲ့ကြပြီး၊ နောက်ထပ် တနာရီအကြာ သူ့အိမ်မှာပဲ သေဆုံးသွားတာဖြစ်ပါတယ်။
သူဟာ မြွေကိုင်တဲ့ တတိယမျိုးဆက်ဖြစ်ပြီး၊ Pentecostal အသင်းတော်ငယ်ဖြစ်တဲ့ Full Gospel Tabernacle, in Middlesboro, Ky ရဲ့ သင်းအုပ်ဖြစ်ပါတယ်။ အဲဒီမြို့ဟာ Tennessee ပြည်နယ်ရဲ့ မြောက်ဖက်နယ်စပ်မှာ ရှိပါတယ်။ National Geographic Channel ရဲ့ “Snake Salvation” အစီအစဉ်ကြောင့် မနှစ်က နာမည်ကြီးလာသူ ဖြစ်ပါတယ်။
အဲဒီအစီအစဉ်မှာ ပြောသွားတာကတော့ …..
“Appalachia တောင်တန်းတွေပေါ်က Pentecostal pastors တွေဖြစ်တဲ့ Jamie Coots နဲ့ Andrew Hamblin တို့ဟာ သက်တမ်း ၁၀၀ ကျော်လာပြီဖြစ်တဲ့ ဘုရားကျောင်းထဲမှာ မြွေကိုင်ပြတဲ့အလေ့ကို ဆက်ထိန်းဖို့ ကြိုးစားနေပါတယ်။ ဘိက်သိက်ပေးထားတဲ့ သူတို့နှစ်ယောက်ဟာ မြွေကိုင်ရင် အနာတရမဖြစ်ဘူးလို့ ကျမ်းတပိုဒ်အရ ယုံကြည်ကြတယ်။ မြွေမကိုင်ဘဲနေရင်တော့ ငရဲကျလိမ့်မယ်လို့လည်း ယုံနေပါတယ်။ သူတို့ဟာ အနီးအနား တောင်တန်းတွေမှာ မြွေတွေ ရှာဖွေ၊ စုဆောင်းတဲ့ အလုပ်ကို လုပ်နေသူတွေ ဖြစ်ပါတယ်။ ပတ်ဝန်းကျင်က မကြိုက်ကြလို့ ဥပဒေကြောင်းအရ ခဏခဏ ရင်ဆိုင်ရသလို၊ မိသားစုမှာလည်း အသက်အန္တရာယ် စိုးရိမ်နေရပါတယ်။”
၁၉၉၈ နှစ်တုန်းက rattlesnake မြွေကြီးတကောင်ကိုက်လို့ သေလုနီးနီး ဖြစ်ခဲ့ဖူးပါတယ်။ ညာဖက် လက်ခလယ်မှာ ကိုက်ခဲ့တာပါ။ ဆေးကုဖို့ ငြင်းခဲ့လို့ ညာဖက်လက်မောင်း ယောင်ကိုင်းပြီး၊ ညိုမဲလာတယ်။ အရည်ကြည်ဖုတွေ ပေါက်လာပြီး၊ ညာဖက် လက်ခလယ် ပြတ်ကျခဲ့ပါတယ်။
သူတို့က Mark 16: 17-18 ကို အလွဲယူကြတာပါ။ ဒါပေမယ့် Protestant churches အများစုကတော့ ဒါကို အားမပေးပါဘူး။ - (The Blaze)
==================================================
ခရစ်ယာန် အော်စကာဆု
Feb. 10, 2014 6:30pm
၂၂ ကြိမ်မြောက် Movieguide Faith & Values Awards ဆုပေးပွဲကို ကယ်လီဖိုးနီးယားပြည်နယ် Universal City မှာ ကျင်းပခဲ့ပါတယ်။ ဒီပွဲက ၂၀၁၃ ခုနှစ်အတွင်း ဟောလိဝုဒ်ရဲ့ အကောင်းဆုံး စိတ်ဓါတ်ခွန်အားပေးတဲ့ ရုပ်ရှင်နဲ့ T.V အစီအစဉ်တွေကို ဆုချီးမြှင့်တာ ဖြစ်ပါတယ်။
ဒီနှစ်ရသူတွေကတော့ “Grace Unplugged” ရုပ်ရှင်နဲ့ the History Channel ရဲ့ “The Bible” T.V စီးရီးတို့ဖြစ်ပါတယ်။ ဆုငွေ ဒေါ်လာ တသိန်းစီရကြပါတယ်။
ဆုပေးရခြင်းကတော့ “ဘုရားသခင်ကို လူတွေ ပိုနားလည်စေ၊ ချစ်တတ်လာစေတဲ့ အတွက်ကြောင့်” ဆုပေးတာပါ လို့ ဆိုပါတယ်။
မိသားစုအတွက် အကျိုးပြုတဲ့ တခြားရုပ်သံတချို့လည်း ဆုရကြပါတယ်။ မိသားစုအတွက် အကောင်းဆုံးရုပ်ရှင်ကတော့ Disney ရဲ့ “Frozen” နဲ့ “Iron Man 3″ တို့ ဖြစ်ပါတယ်။
ခရစ်ယာန်တွေ သိပ်ကြိုက်ကြတဲ့ “Duck Dynasty” ဆိုတဲ့ T.V အစီအစဉ်ကတော့ “Faith & Freedom Award” ဆုရပါတယ်။ သူက T.V မှာ စိတ်ဓါတ်ကောင်းလေးတွေ မြှင့်တင်ပေးလို့ ရတာ ဖြစ်ပါတယ်။
“Mark Burnett နဲ့ သူ့ဇနီး၊ မင်းသမီး Roma Downey တို့ ဆုပေးပွဲကို တက်ရောက်လာကြပြီး၊ နှစ်ယောက်လုံး “The Bible” အတွက် ဆုရကြပါတယ်။ ပြီးတော့ Burnett က “Free Enterprise Prize” ဆုကို “Shark Tank” အစီအစဉ်အတွက် ရလိုက်ပါသေးတယ်။
Burnett က အမေရိကားဟာ the Bible and free enterprise,” “သမ္မာကျမ်းစာနဲ့ လွတ်လပ်စွာ တည်ထွင်ကြံဆမှု” ဆိုတဲ့ အချက် ၂ ချက်အပေါ်မှာ တည်ဆောက်ထားတာ ဖြစ်တယ်လို့ ဆုပေးပွဲ စဉ်မြင့်ပေါ်မှာ ပြောသွားပါတယ်။
ရုပ်ရှင်ဝေဖန်ရေးဆရာ Dr. Ted Baehr တည်ထောင်တဲ့ Movieguide Awards ဆုတွေဟာ ခရစ်ယာန် ဖျော်ဖြေရေး အသိုင်းအဝိုင်းမှာ အဓိကကျလာတာ အနှစ် ၂၀ ကျော်လာခဲ့ပါပြီ။ ဒီဆုပေးပွဲကို “ခရစ်ယာန် အော်စကာဆု” လို့ ဆိုကြပါတယ်။ ဆုရစာရင်း အပြည့်အစုံကတော့ The Hollywood Reporter the full list မှာ ဝင်ကြည့်နိုင်ပါတယ်။
ဒီပွဲကို Reelz Channel မှာ တနာရီကြာ အထူးအစီအစဉ်အဖြစ် အော်စကာဆုပေးပွဲနဲ့ အပြိုင် မတ်လ ၁- ၃ ရက်မှာ ထုတ်လွှင့် ပြသမှာ ဖြစ်ပါတယ်။ - (The Blaze)

ခရစ်ယာန်သတင်း 2014, Jan

ဆင့်ကဲဖြစ်စဉ် အယူအဆကို စိန်ခေါ်လိုက်သော လူ့လက် အရိုးစု

HUMAN HAND BONE CHALLENGES EVOLUTION

                ကင်ညာနိုင်ငံ မြောက်ပိုင်းမှာတွေ့ရတဲ့ လူ့လက် အရိုးတစုံကြောင့် လေ့လာသူတွေ အံအားသင့် သွားကြတယ်။ ကျောက်လွှာတွေထဲမှာတွေ့ရတဲ့ အဲဒီအရိုးစုကို နှစ်ပေါင်း ၁.၄ သန်းလောက်က အရိုးလို့ ခန့်မှန်းကြပြီးတော့ ကမ္ဘာသက်တန်း အရင့်ဆုံး လက်အရိုးစုလို့ အမွှန်းတင် ကြတယ်။ ဒါပေမယ့် အဲဒီလက်အရိုးစုက အရွယ်ငယ်နေတော့ သက်တမ်းတွက်ချက်သူတွေကို စိန်ခေါ်သလို ဖြစ်လာပါတယ်။ လောကီအသိုင်းအဝိုင်းက ပြောနေသလို၊ အဲဒီရှေးအကျဆုံး လက်အရိုးစုဟာ နှစ်သန်းတဝက်လောက် ကြာခဲ့ပြီဆိုရင်တောင်၊ ဒီလောက် နှစ်ပေါင်းများစွာ ကြာပေမယ့် ဘာမှ ဆင့်ကဲပြောင်းလဲမှု မရှိတာကို ပြနေပါတယ်။ အခုတွေ့တာက ၅ ပေ၊ ၁၀ လက်မ ရှိတဲ့ လူတယောက်ရဲ့ လက်အရိုးဖြစ်တယ်လို့ နှိုင်းယှဉ်ကြပါတယ်။ “အခုခေတ်လူတွေရဲ့ လက်နဲ့ အရွယ်အစားရော၊ ပုံစံပါ အစစ အရာရာ တူနေတယ်” လို့ ဆိုပါတယ်။
အခုတွေ့ရတဲ့ သက်တမ်းအရင့်ဆုံး လူ့လက်အရိုးစုဟာ လူတွေ ဆင်ကဲ့ဖြစ်စဉ် ပြောင်းလဲလာတယ်ဆိုတဲ့ သက်သေမျိုး လုံးဝ မပြခဲ့ပါဘူး။ အခု ကင်ညာအရိုးစုက “man originating…as man” လူဟာ လူအဖြစ်နဲ့ပဲ အစပြုလာတာပါလို့ ထောက်ပြနေပါတယ်။ (“Surprising Human Hand Bone,” Brian Thomas, Institute for Creation Research, Jan. 10, 2014)
 မှတ်ချက်။         ။ တကယ်တော့ သူတို့ရဲ့ သက်တမ်းတွက်ချက်နည်း dating methods တွေကလည်း မှားနေပါတယ်။ လူကြီးတွေက ကလေးတွေကို ပုံပြောပြတဲ့အခါ “ဟိုး …. ရှေးရှေးတုန်းက …. “ လို့ စ တယ်မဟုတ်လား။ ဒါဝင်ရဲ့ နောက်လိုက်တွေကလည်း သက်တမ်းတွက်ချက်ရာမှာ “ဟိုး ….. လွန်ခဲ့တဲ့ နှစ်သန်းပေါင်း သန်းချီတုန်းက ….. “ လို့ စပြောကြပါတယ်။ လုပ်ရပ်ကတော့ တူတူပါပဲ။ ပုံပြောနေကြတာပါ။

ခရစ်ယာန်တယောက်အတွက် အဆိုးဆုံးနေရာ ၁၀ ခု

10 WORST PLACES IN THE WORLD TO BE A CHRISTIAN

ကမ္ဘာတဝှန်းက ခရစ်ယာန်တွေ အညှဉ်းဆဲခံရမှုတွေကို လေ့လာစောင့်ကြည့်နေတဲ့ Open Doors, USA အဖွဲ့က ၂၀၁၄ အတွက် ထုတ်ပြန်လိုက်တဲ့ စာရင်းဖြစ်ပါတယ်။ အစိုးရရဲ့ ရက်စက်စွာ ဖိနှိပ်မှု (သို့) အစွန်းရောက်တွေရဲ့ အကြမ်းဖက် သတ်ဖြတ်မှုတွေ ရှိတဲ့ တိုင်းပြည်စာရင်း ဖြစ်ပါတယ်။ အဆိုးဆုံး နေရာတွေကတော့ “မြောက်ကိုရီးယား၊ ဆိုမာလီးယား၊ ဆီးရီးယား၊ အီရတ်၊ အာဖကန်နစ်စတန်၊ ဆော်ဒီအာရေးဗီးယား၊ မယ်လဒိုက်၊ ပါကစ္စတန်၊ အီရန်၊ ယီမင်” တို့ဖြစ်ပါတယ်။ ဒါတွေနဲ့ ပါတ်သက်လို့ သမတ အိုဘားမားအစိုးရက ကာကါယ်ပေးမှု အားနည်းခဲ့တယ်။ အနောက်နိုင်ငံ အစိုးရတွေအနေနဲ့လည်း ဘာသာရေး လွတ်လပ်ခွင့်အတွက် ခေါင်းဆောင်မှု အားနည်းခဲ့တယ်လို့ ဆိုပါတယ်။ (The Blaze, Jan. 8, 2014)
မှတ်ချက်။           ။ မိတ်ဆွေအများ နေထိုင်ရာ ရွှေပြည်ကြီးကတော့ နံပါတ် ၂၃ ပါ။

ဦးနှောက်ရဲ့ အဓိက နာရီကြီး

THE BRAIN’S MASTER CLOCK

လူ့ကိုယ်ခန္ဓာမှာ မတူညီတဲ့ rhythms စည်းချက်အမျိုးမျိုး ရှိပါတယ်။ ဥပမာ …. ကိုယ်အပူချိန်နဲ့ သွေးပေါင်ချိန်ဟာ ၂၄ နာရီ တရက်အတွင်း လည်ပတ်နေပါတယ်။ တခြား rhythms ရစ်သမ် စည်းချက်တွေကတော့ ရ ရက်တခါ၊ ၂၈ ရက်တခါ စသည်ဖြင့် လှည့်ပတ်နေပါတယ်။ တချို့ ရစ်သမ် စည်းချက်တွေကို hypothalamus ဆိုတဲ့ ဦးနှောက်ရဲ့ အစိတ်အပိုင်းတခုက ထိန်းချုပ်ပြီးတော့၊ တချို့ကိုတော့ pituitary gland ဆိုတဲ့ ဟော်မုန်းထုတ်ပေးတဲ့ အကြိတ်က ထိန်းပါတယ်။ ဒါပေမယ့် တချို့အကြိတ်တွေကိုလည်း တခြားအင်္ဂါအစိတ်းအပိုင်းတွေရဲ့ rhythms တွေက ထိန်းချုပ်တတ်ပြန်ပါတယ်။ ဒါက ဘာနဲ့တူလည်းဆိုတော့ အခန်းတခန်းထဲမှာ နာရီပေါင်း ရာနဲ့ချီပြီး လည်ပတ်နေတာနဲ့ တူပါတယ်။ အခြေအနေဆိုးစေချင်ရင် နာရီတွေကို ရပ်ခိုင်းလိုက်ပါ။ အချိန်မမှန်စေနဲ့။ ဒါဆို ရှုပ်ထွေးသွားပြီပေါ့။
ဒါပေမယ့် ကိုယ်ထဲမှာရှိတဲ့ နာရီအားလုံးနဲ့ တွဲဖက်အလုပ်လုပ်နေတဲ့ အဓိက Master နာရီကြီးတလုံး ဦးနှောက်မှာ ရှိတယ်လို့ တွေ့ရှိထားကြပါပြီ။ အဲဒီ အဓိက Master နာရီကြီးက SCN အစီအစဉ်နဲ့ လည်ပတ်နေပါတယ်။ တချိန်တုန်းကတော့ ဒီအလုပ်တွေကို hypothalamus က လုပ်တယ်လို့ ထင်ခဲ့ကြပါတယ်။ ဒါပေမယ့် hypothalamus ဟာ SCN ရဲ့ လက်ထောက်မျှသာ ဖြစ်ပါတယ်။ သူတို့ နှစ်ခု ပူးပေါင်းပြီး ဓါတ်သဘာဝတွေ့ရဲ့ တုန့်ပြန်မှုတွေအတိုင်း လည်ပတ်လိုက်တဲ့အခါ၊ တခြား အင်္ဂါအစိတ်အပိုင်းတွေလည်း မှန်မှန်ကန်ကန် လည်ပတ်ကြပါတော့တယ်။
ဒါကိုကြည့်ရင် လူဟာ အလိုအလျောက် ဖြစ်လာစရာမရှိဘဲ၊ ဘုရားသခင်က ပညာပါပါ ဒီဇိုင်းနဲ့ ဖန်ဆင်းထားတာကို ရိပ်မိနိုင်ပါတယ်။ (www.creationmoments.com, Dec. 16, 2013)

အမေရိကန်ပြည်ရှိ ကျမ်းစာအသိ အရှိဆုံး မြို့ ၁၀ မြို့နဲ့ ကျမ်းစာအသိ အနည်းဆုံး မြို့ ၁၀ မြို့

The 10 Most and Least ‘Bible-Minded’ Cities in America!

          အမေရိကန် ကျမ်းစာအသင်းနဲ့ Barna Group တို့က ကောက်ယူခဲ့တဲ့ စစ်တမ်းဖြစ်ပါတယ်။ မြို့ကြီး ၁၀၀ မှာရှိတဲ့ မြို့သူမြို့သားတွေရဲ့ သမ္မာကျမ်းစာ အသိကို စစ်တမ်းကောက်ယူခဲ့ပါတယ်။ သမ္မာကျမ်းစာကို အသိဆုံးမြို့က Tennessee ပြည်နယ် Chattanooga မြို့ ဖြစ်ပြီး၊ ကျမ်းစာ ဗဟုသုတ မရှိဆုံးမြို့ကတော့ Rhode Island မှာရှိတဲ့ Providence မြို့ ဖြစ်ပါတယ်။
စစ်တမ်းကောက်ယူပုံကတော့ ပြီးခဲ့တဲ့ ရ ရက်အတွင်း သမ္မာကျမ်းစာ ပုံမှန်ဖတ်ရှုခဲ့ခြင်း ရှိ/မရှိနဲ့ သမ္မာကျမ်းစာ အမှားအယွင်း မရှိကြောင်း ယုံကြည်မှုအပေါ်မှာ မေးမြန်းကောက်ယူခဲ့ပါတယ်။ စစ်တမ်းအရ အမေရိကန်ပြည် အနောက်အလယ်ပိုင်းနဲ့ တောင်ပိုင်းဒေသတွေဟာ ခရစ်ယာန်ဒေသတွေ ဖြစ်ပါတယ်။ အရှေ့ဖက်ကမ်းခြေဒေသက မြို့တွေကတော့ သမ္မာကျမ်းစာ သိကျွမ်းမှု အားနည်းနေပါတယ်။
ကျမ်းစာသိတဲ့ မြို့ ၁၀ မြို့ကတော့ …….
1.      Chattanooga, Tenn.
2.     Birmingham, Ala.
3.     Roanoke/Lynchburg, Va.
4.     Springfield, Mo.
5.     Shreveport, La.
6.     Charlotte, N.C.
7.     Greenville/Spartanburg, S.C./Asheville, N.C.
8.     Little Rock, Ark.
9.     Jackson, Miss.
10. Knoxville, Tenn.
 ကျမ်းစာ သိပ်မသိတဲ့ မြို့ ၁၀ မြို့ကတော့ ………
1.      Providence, R.I./New Bedford, Mass.
2.     Albany, N.Y.
3.     Boston
4.     San Francisco
5.     Cedar Rapids, Iowa
6.     Buffalo, N.Y.
7.     Hartford/New Haven, Conn.
8.     Phoenix
9.     Burlington, Vt.
1         10. Portland, Maine

ကချင်ဆိုတာ ငါတို့ညီအကို Kachin is our brother!

မြန်မာအစိုးရတပ်နဲ့ ကချင် K.I.A တပ်တွေရဲ့ စစ်ပွဲတွေဟာ မဖြစ်သင့်ဘဲ ဖြစ်ရတာမို့ အလွန်စိတ်မကောင်းစရာပါပဲ။ ဒီထက်ပိုပြီး စိတ်မကောင်းစရာဖြစ်ရတာက အမျိုးသမီးတွေ မတရားပြုကျင့်ခံရတာ၊ အထင်နဲ့ ညှင်းပန်းနှိပ်စက်ခံရတာ၊ ရက်ရက်စက်စက် သတ်ဖြတ်ခံရတာတွေပါပဲ။ စစ်ဖြစ်တာကို နားလည်ပေးနိုင်ပေမယ့် အရပ်သားတွေကို သတ်ဖြတ်ညှင်းဆဲတာကတော့ စည်းကမ်းနဲ့ စိတ်ဓါတ်ပိုင်းအရ နိမ့်ကျလွန်းလို့ အတော်စိတ်ပျက်စရာ ကောင်းပါတယ်။ ဒါဟာ ကိုယ်ကျင့်တရားနဲ့ဆိုင်ပါတယ်။
ဒီထက်ပိုဆိုးတာက ကချင်တွေကို မျိုးဖြုတ်ပစ်မယ်ဆိုတဲ့စကားပါပဲ။
ကချင်လူမျိုးအများစုနဲ့ ဘာအငြိုးအတေးမှ မရှိပါဘဲနဲ့ မျိုးဖြုတ်ပစ်မယ်လို့ ပြောတာဟာ အတော်နားလည်ရခက်ပါတယ်။ လူဟာ ပုံမှန်ဆိုရင် ဒီလိုမပြောတတ်ပါဘူး။ ညီအကိုချင်းကို မျိုးဖြုတ်ရင် ကိုယ့်အမျိုး ဆက်ကောင်းစားဖို့ မလွယ်ပါဘူး။
၁။ ကချင်လူမျိုးဟာ တိဗက်မြန်မာအုပ်စုမှာပါတယ်လို့ ဆိုကြတယ်။
၂။ ကချင်လူမျိုးဟာ အများအားဖြင့် အေးအေးနေတတ်ပါတယ်။
 အေးအေးနေတတ်လွန်းလို့ပင်လျှင် ကချင်လူငယ်တွေမှာ မူးယစ်ဆေးပြဿနာ ကြုံနေရတာပါ။
၃။ K.I.A ကလည်း ညှိလို့ရနိုင်ပါတယ်။ တခြားသူတွေက “စစ်အစိုးရ” လို့ ခပ်ပြတ်ပြတ်ခေါ်နေချိန်မှာ၊ K.I.A ခေါင်းဆောင်တွေက “နိုင်ငံတော်အစိုးရ” လို့
 လေးလေးစားစား ခေါ်နေဆဲပါပဲ။
၄။ ညှိရခက်နေတာတွေကလည်း စကားအခေါ်အဝေါ်တွေ ဖြစ်နေပါတယ်။ လက်တွေ့မယုံရတဲ့ အပစ်အခတ်ရပ်စဲရေး၊ ငြိမ်းချမ်းရေးတို့ကိုတော့ K.I.A က အတော်အီနေတာလည်း ပါပါလိမ့်မယ်။ ယုံကြည်မှုတည်ဆောက်ဖို့ရာက စကားနဲ့ပဲ မရတတ်ပါဘူး။ ယုံလောက်အောင် စိတ်ထားနဲ့ အပြုအမူတွေ တိုးတက်လာဖို့ လိုပါတယ်။
၅။ နှစ်ဦးနှစ်ဖက် အတိတ်က နာကျည်းချက်တွေ ရှိခဲ့ကြရင်လည်း အဆိုးကို အဆိုးနဲ့ မတုန့်ပြန်ကြဘဲ အကောင်းနဲ့ ပြန်တုန့်ကြမယ်ဆိုရင် ပိုကောင်းမှာပါ။ အမှားတွေရှိခဲ့ကြရင်လည်း ပြန်တောင်းပန်ကြ၊ ပြန်ကျေးဇူးပြုကြတဲ့နည်းတွေနဲ့ ရှေ့ဆက်သွားဖို့ စဉ်းစားကြရပါမယ်။
၆။ လူမျိုးတိုင်းမှာ အားသာချက်တွေ ရှိကြသလို၊ အားနည်းချက်တွေလည်း ရှိစမြဲပါ။ တခြားလူမျိုးတွေကို မယုံဘဲ၊ ကိုယ်တမျိုးတည်း ရှိသမျှနေရာအကုန်ယူမယ်ဆိုရင် တိုးတက်ဖို့၊ အောင်မြင်ဖို့ မလွယ်ပါဘူး။ ကရင်လူမျိုးဟာ လူမှုရေးအားသန်တဲ့လူမျိုးဖြစ်တယ်လို့ ယူဆကြမယ်ဆိုရင် ကျန်းမာရေးစောင့်ရှောက်မှုတွေ၊ လူမှုရေးကူညီမှုတွေ တေးဂီတတွေမှာ တိုင်းပြည်နဲ့ လူသားတွေအတွက် အားတအား ဖြစ်ပါတယ်။ ကချင်လူမျိုးတွေကတော့ နိုးဆော်တဲ့လူမျိုးလို့ ဆိုနိုင်မယ်ထင်ပါတယ်။ (ဘယ်သူမှ မတက်ချင်သေးတဲ့ ညောင်နှစ်ပင် ညီလာခံကို စတက်ပြတာကို ကြည့်ပါ။) တိုင်းပြည်နဲ့ လူတွေအတွက် ကောင်းရာကောင်းကျိုးတွေ လုပ်စရာအများကြီးပါ။ လုပ်ဖို့လိုတယ်လို့ သိနေရင်တောင် တကယ်ထ, လုပ်ကြဖို့ နိုးဆော်ပေးဖို့ လိုပါတယ်။ ဒါလည်း တိုင်းပြည်အတွက် အားတမျိုးပါ။ ဒီအားကို မသုံးဘဲနေရုံမကဘဲ ဖျက်ဆီးမယ်ဆိုတာ သိပ်ဆိုးပါတယ်။
၇။ ကချင်ပြည်နယ်က ကျောက်စိမ်းထွက်တာတော့ အားလုံးသိကြပါတယ်။ အဖိုးလည်းတန်ပါတယ်။ တိုင်းပြည်အတွက်ဖြစ်စေ၊ လူတွေအတွက်ဖြစ်စေ အကျိုးရှိအောင်သုံးရင် သိပ်ကောင်းပါတယ်။ ဒါပေမယ့် အဲဒီကျောက်စိမ်းဟာ သာမန်လူအများစုအတွက် သိပ်အကျိုးမပေးပါဘူး။ ဘာမှလည်း ထိထိရောက်ရောက် အကျိုးမခံစားရပါဘူး။ လူအများ အကျိုးသိပ်မခံစားရတဲ့ ကျောက်စိမ်းအတွက်နဲ့ စစ်ဖြစ်ပြီး၊ လူတွေ ရာနဲ့ချီသေနေရတယ်ဆိုရင်တော့ မကောင်းပါဘူး။ မဖြစ်သင့်ပါဘူး။ ကချင်ပြည်နယ်ကထွက်ပြီး တခြားသူတွေကိုပါ အကျိုးရှိစေမယ့်အရာကတော့ ကချင်တိုင်းရင်းဆေးတွေ ဖြစ်ပါတယ်။ ကချင်အမျိုး (အကြမ်းအားဖြင့်) ၆ မျိုးရှိရာမှာ ဂျင်းဖေါအမျိုးဟာ ဆေးရသူတွေ ဖြစ်ပါတယ်။ ဒဏ်ကြေဆေး၊ တီဘီဆေး၊ ဆီးချို သွေးချိုးဆေးကအစ ကင်ဆာဆေးအထိ ရှိပါတယ်။ (နဲနဲလျှော့ ပြောထားတာပါ။) ဂျင်းဖေါအိမ်တိုင်းလိုလိုမှာ မိဘအစဉ်အဆက် သုံးလာတဲ့ ဆေးတမျိုးတော့ ရှိတတ်ပါတယ်။ ခေတ်မှီစက်ကရိယာတွေနဲ့ စမ်းသပ်ထုတ်လုပ်ထားတာ မဟုတ်သေးပေမယ့် ရောဂါပျောက်ကင်းသူတွေ အများကြီးရှိပါတယ်။ ကင်ဆာဆိုရင် ပိုက်ဆံတတ်နိုင်သူတွေက နိုင်ငံခြားတိုင်းပြည်တွေမှာ ငွေကြေးအကုန်အကျခံပြီး သွားကုနိုင်ကြပေမယ့် ဆင်းရဲသူတွေကတော့ ပြည်တွင်းမှာ အသေခံကြရမှာလား? မဟုတ်ဘူး။ ကချင်ကင်ဆာဆေးထုပ်တထုပ်က မြန်မာငွေ ရာဂဏန်းလောက်နဲ့ ရနိုင်ပါတယ်။ ကဲ... ပြည်သူပြည်သား လူအများအတွက် အကျိုးမရှိဘူးလား? ညီအကိုချင်း ယိုင်းပင်းကူညီပြီး ချစ်ချစ်ခင်ခင်နေဖို့ ကြီုးစားရမယ့်အစား အမျိုးဖြုတ်ပစ်မယ်ဆိုတာကြီးက ဘယ်သူ့အကျိုးမှ မရှိနိုင်ပါဘူး။ ညီအကိုမောင်နှမ သားချင်းရှိတာနဲ့ ညီအကိုမောင်နှမမရှိတဲ့ တကောင်ကြွက်ဘဝ ဘယ်ဟာက ပိုကောင်းမလဲ စဉ်းစားကြည့်ပါ။  ကဲ... ကချင်ဟာ တို့ညီအကိုမဟုတ်လား? တခြားတိုင်းရင်းသားတွေလည်း တို့ညီအကိုမဟုတ်လား? ဒီထက်ပို ပြောပါဦးမယ် ... အသားအရောင်မတူတဲ့ ကမ္ဘာအနှံ့က လူသားတွေဟာ တို့ညီအကိုမဟုတ်လား? ဒါက ဉာဏ်နည်းရင် မမြင်ဘဲ ဖြစ်နေတတ်ပါတယ်။

လိုင်ဇာမြို့အဝင်ဝအထိ အစိုးရတပ် သိမ်းပိုက်

News:   လိုင်ဇာမြို့အဝင်ဝအထိ အစိုးရပ်တပ် သိမ်းပိုက် - February 1, 2013
Views: ရှောလုမင်းက ဒါဝိဒ်ကို အကြောင်းမရှိ၊ အကြောင်းရှာ အမြဲတိုက်ခိုက်နေခဲ့ပါတယ်။ ဒါဝိဒ်က လူနည်းစု။ ရှောလုက စစ်တပ်ကြီး။ တကြိမ်မှာတော့ ဝိုင်းပိတ်ဆို့ရင်း ဖမ်းမိလုလု ဖြစ်သွားတယ်။
 ရှောလုမင်းရဲ့ စစ်တပ်နဲ့ ဒါဝိဒ်ရဲ့ကြားမှာ ကျောက်တန်းတတန်းပဲ ခြားပါတော့တယ်။
 ကျောက်တန်းကျော်ရင် ဒါဝိဒ်ကို ဖမ်းမိတော့မယ်။
ဒီအချိန်မှာ မမြော်လင့်တဲ့ ပြဿနာတခု ရှောလုမင်းမှာ ဝင်လာတယ်။ နိုင်ငံခြားက ဖိလိတ္တိတပ်တွေ ဝင်လာတယ်လို့ သတင်းပို့လာတယ်။ မဖြစ်သာတော့ ရှောလုမင်း ဒါဝိဒ်ကို မဖမ်းသာဘဲ နောက်ပြန်လှည့်ရတယ်။ ဒီအခါမှာ ဒါဝိဒ်ဟာ အဲဒီကျောက်တန်းကို “သေလဟမ္မလေကုပ်” လို့ နာမည်ပေးပါတယ်။ အဓိပ္ပါယ်က "Rock of Division" “စည်းခြားထားတဲ့ ကျောက်ပါ”။ သူ့ရန်သူကို အဲဒီကျောက်တန်း ကျော်ဖို့ ဘုရားသခင် အခွင့်မပေးခဲ့လို့ပါ။ ဘုရားက ရန်သူကို အခွင့်ပေးတာဟာ အကန့်အသတ်နဲ့ပါ။ တကယ်တော့ ဒီအခြေအနေဟာ စိတ်ဓါတ်ကျစရာမဟုတ်ဘဲ၊ ဘာဆက်ဖြစ်မလဲဆိုတာ စောင့်ကြည့်ဖို့ စိတ်လှုပ်ရှားစရာ အကောင်းဆုံး အခြေအနေတခုပါ။ ၁ရာ ၂၃း ၂၅- ၂၉ -